“Avropa Azərbaycanlıları Mühəndislər İttifaqı”nın nümayəndələri ilə görüş keçirilib

Azərbaycan Metrologiya İnstitutunda (AzMİ) “Avropa Azərbaycanlıları Mühəndislər İttifaqı”nın (AAMİ) nümayəndələri ilə işgüzar görüş keçirilib.

Görüşdə AAMİ-nin İdarə Heyətinin sədri, professor Yaşar Musayev, o cümlədən İdarə Heyətinin üzvü, Dövlət Neft Şirkətinin (SOCAR) Əqli mülkiyyət və layihələrin işlənməsi şöbəsinin rəisi Elbəy Babayev iştirak ediblər.

Görüş zamanı AzMİ-nin fəaliyyət istiqamətləri, ölçmə və kalibrlənmə imkanları, laboratoriya infrastrukturu və bu sahədə görülən işlər haqqında ətraflı məlumat verilib.

Daha sonra professor Yaşar Musayev bərpa olunan enerji mənbələrinin - külək və günəş enerjisinin tətbiqi, o cümlədən hidrogen texnologiyaları üzrə laboratoriyaların yaradılmasının önəmindən bəhs edib.

Görüş çərçivəsində “Layihə İdarəetməsi üzrə Peşəkar” (Project Management Professional - PMP) təlimlərin təşkili, habelə elmi-texnoloji təşəbbüslərə dəstək mexanizmləri və bu sahədə beynəlxalq təcrübədən istifadə ətrafında müzakirələr də aparılıb.

Sonda AzMİ-nin tibb, həcm, müqavimət, vaxt və tezlik, kütlə və digər laboratoriyalarına baxış keçirilib.