Azərbaycan Metrologiya İnstitutunda Azərbaycan Sənaye Təhlükəsizliyi Assosiasiyasının nümayəndələri ilə görüş keçirilib

Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin tabeliyində olan Azərbaycan Metrologiya İnstitutunda (AzMİ) Azərbaycan Sənaye Təhlükəsizliyi Assosiasiyasının nümayəndələri ilə görüş keçirilib.

Görüşdə sənaye müəssisələri üçün metroloji xidmətlərin keyfiyyət, dəqiqlik və təhlükəsizlik baxımından əhəmiyyəti vurğulanıb. Eyni zamanda Assosiasiyaya üzv olan müəssisələrin məlumatlandırılması istiqamətində əməkdaşlığın genişləndirilməsi və sənaye təhlükəsizliyinin təmin olunmasında müasir yanaşmaların tətbiqi ətrafında müzakirələr aparılıb. Həmçinin İnstitutun fəaliyyət istiqamətləri, ölçmə və kalibrlənmə imkanları, mövcud və qurulması nəzərdə tutulan laboratoriyalar, eləcə də gələcək perspektivlər barədə ətraflı məlumat təqdim edilib.

Görüş çərçivəsində AzMİ-nin tibb, həcm, müqavimət, kütlə, təzyiq, mayelərin kinematik özlülüyü, temperatur, mayelərin sıxlığı, vaxt, tezlik və mikrodalğa ölçmələri laboratoriyalarına baxış keçirilib, laboratoriyaların fəaliyyəti və texniki imkanlarından bəhs olunub.

Sonda qarşılıqlı tərəfdaşlıq imkanları və birgə fəaliyyət istiqamətləri üzrə ilkin razılıq əldə olunub.