Antiinhisar və İstehlak Bazarına Nəzarət Dövlət Xidmətinin tabeliyində olan Azərbaycan Metrologiya İnstitutu ilə Azərbaycan Dövlət Neft və Sənaye Universiteti “AzMİ Akademiya”nın yaradılması ilə bağlı razılığa gəliblər.

İqtisadiyyat Nazirliyi yanında  Antiinhisar və İstehlak Bazarına Nəzarət Dövlət Xidmətinin tabeliyində olan Azərbaycan Metrologiya İnstitutu (AzMİ) ilə Azərbaycan Dövlət Neft və Sənaye Universiteti (ADNSU) “AzMİ Akademiya”nın yaradılması ilə bağlı razılığa gəliblər.

Razılaşma “20 may - Ümumdünya metrologiya günü” ərəfəsində keçirilən “Dəqiq ölçmələr dayanıqlı yaşıl dünya naminə” V Beynəlxalq elmi-praktiki simpoziumda əldə olunub.

Simpoziumda çıxış edən ADNSU-nun rektor əvəzi, dosent Vazeh Əskərov bildirib ki, “AzMİ Akademiya”nın yaradılması barədə imzalanan saziş elmi-tədqiqat layihələrinin icrası, o cümlədən metrologiya sahəsində tələbələrin biliklərinin artırılması üçün təlim ehtiyaclarının qarşılanmasına töhfə verəcək.

Dövlət Xidmətinin Təbii İnhisarlara Dövlət Nəzarəti şöbəsinin müdiri Xamis Seyranov qurumlararası razılaşmanın bakalavr, magistratura, doktorantura/dissertantura pilləsində təhsilalanların, ölçmələr üzrə elmi tədqiqatçıların AzMİ-nin müvafiq laboratoriyalarında praktiki bacarıqlarının artırılmasına geniş imkanlar yaradacağını diqqətə çatdırıb.

Tədbirə onlayn formatda qoşulan Türkiyə Elmi və Texnoloji Tədqiqat Şurasının Milli Metrologiya İnstitutunun (TÜBİTAK UME) rəhbəri Mustafa Çetintaş simpoziumun əhəmiyyətindən danışıb və “AzMİ Akademiya”nın yaradılması münasibətilə tərəfləri təbrik edib. Bildirib ki, sözügedən layihə metrologiya sahəsində birgə elmi-texniki konfransların, seminarların və təlimlərin keçirilməsi, o cümlədən tədqiqat işlərinin aparılmasında faydalı olacaq.

Simpozium yaşıl dünya naminə metrologiyanın bu günü və sabahı, yaşıl dünya konsepsiyalarında mexatronika mühəndisliyinə yeni yanaşma, müasir ölçmələrdə yaşıl texnolgiyalar və digər mövzularda çıxışlarla davam etdirilib.