AzMİ-nin əməkdaşları Moldovada regional seminarda iştirak ediblər

Azərbaycan Metrologiya İnstitutunun (AzMİ) əməkdaşları Moldovanın paytaxtı Kişineu şəhərində “Şərq Tərəfdaşlığı Ölkələrində Artan Ticarət üçün Keyfiyyət Standartları” layihəsi çərçivəsində keçirilən “Gələcək Regional Əməkdaşlıq Potensialının Araşdırılması” adlı regional seminarda iştirak ediblər.

Seminarda Azərbaycanla yanaşı, Almaniya, Ukrayna, Moldova və Gürcüstanın metrologiya, standartlaşdırma və akkreditasiya üzrə müvafiq dövlət qurumlarının nümayəndələri iştirak ediblər.

Tədbir çərçivəsində Almaniyanın milli metrologiya təşkilatı olan Fiziki-Texniki Federal İnstitutun (PTB) “Şərq Tərəfdaşlığı” ölkələri üçün 2025-2028-ci illəri əhatə edən prioritet əməkdaşlıq istiqamətləri, xüsusilə metrologiya, standartlaşdırma və akkreditasiya sahələrində mövcud imkanlar, eləcə də yeni regional əməkdaşlıq perspektivləri müzakirə olunub.

AzMİ-nin nümayəndələri seminarda institutun fəaliyyət istiqamətləri, mövcud laboratoriyaları, infrastruktur imkanları və beynəlxalq əməkdaşlıqları barədə ətraflı məlumat veriblər. Bundan əlavə, metrologiya sahəsində görülən işlər və gələcək inkişaf planları iştirakçılarla paylaşılıb.

Seminar çərçivəsində, həmçinin regional fəaliyyətin genişləndirilməsi, yeni rəqəmsal imkanların yaradılması və bu istiqamətdə qarşılıqlı əməkdaşlığın gücləndirilməsi mövzusunda fikir mübadiləsi aparılıb.

Qeyd edək ki, bu seminar Azərbaycanla “Şərq Tərəfdaşlığı” proqramının iştirakçısı olan ölkələr arasında iqtisadi əlaqələrin möhkəmləndirilməsi və yeni imkanların yaradılması baxımından mühüm əhəmiyyət kəsb edir.