AzMİ tərəfindən AQTİ-nin Bakı Regional Sınaq Laboratoriyasında ölçmə vasitələrinin metroloji yoxlanılması həyata keçirilib

Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin tabeliyində olan Azərbaycan Metrologiya İnstitutunun (AzMİ) mütəxəssisləri tərəfindən Azərbaycan Qida Təhlükəsizliyi İnstitutunun (AQTİ) Bakı Regional Sınaq Laboratoriyasında ölçmə vasitələrinin metroloji yoxlanılması və attestasiyası aparılıb.

Belə ki, pH-metr və konduktometr vasitəsilə distillə olunmuş suyun pH göstəricisi və elektrik keçiriciliyi ölçülüb. Eyni zamanda Testo 735 tipli nümunəvi rəqəmsal termometrin PT-100 tipli zondundan istifadə edilməklə su hamamı və termostat cihazlarının attestasiyası həyata keçirilib.

Bundan əlavə, F1 sinifli etalon çəki daşları vasitəsilə maksimal ölçmə həddi 210 qram olan analitik tərəzilər yoxlanılıb.

Qeyd edək ki, bu cür metroloji yoxlanılmalar ölçmələrin etibarlılığının artırılması və nəticələrin beynəlxalq tələblərə uyğunluğunun təmin edilməsi məqsədi daşıyır.