Belarusun Standartlaşdırma üzrə Dövlət Komitəsinin sədri AzMİ laboratoriyalarına baxış keçirib

Belarus Respublikasının Standartlaşdırma üzrə Dövlət Komitəsinin (Госстандарт РБ) sədri Yelena Morqunovanın rəhbərlik etdiyi nümayəndə heyəti Azərbaycan Metrologiya İnstitutunun nəzdində fəaliyyət göstərən dövlət ilkin etalon laboratoriyaları, o cümlədən ölçmə vasitələrinin yoxlanılmasını və kalibrlənməsini yerinə yetirən digər laboratoriyalara baxış keçirib.

Görüş zamanı nümayəndə heyətinə dövlət etalonlarının saxlanılma qaydaları və kəmiyyət vahidlərinin ötürülməsi barədə məlumat verilib. Bildirilib ki, yeni ölçmə imkanlarının artırılması məqsədilə AzMİ-də 12 müasir laboratoriya şəbəkəsinin qurulmasına başlanılıb. Ümumilikdə 27 laboratoriyanin yaradılması və təkmilləşdirilməsi üzrə işlərin davam etdirilməsi nəzərdə tutulub.

Görülən tədbirlərin ölkədə metroloji xidmət keyfiyyətinin yüksəldilməsi və metroloji ehtiyacların qarşılanmasına geniş imkanlar yaradacağı diqqətə çatdırılıb.